Mamis, ihr sind mini Heldinne!

Danke all ihr Mamis für das was ihr jede Tag leischtet! Für mich sind ihr die wahre Heldinnen!

Es isch so wichtig, dass d’Wärtschätzig für das, was all die Mamis leischtet, i eusere Gesellschaft nu viel grösser wird! Und mer de Mamis meh Möglichkeite git, s Familieläbe harmonischer z gschtalte!

Wenn ich s mier rächt überlegge, gits vilicht kei wichtigere Bruef, als Mami z sii!

Well doch d Familie die chliinschti Zälle i de Gsellschaft darstellt, s Mami meischtens de Ankerpunkt i de Familie isch und wenn d Familie nümme funktioniered, funktioniert eusi ganzi Gsellschaft nümme. Und so vili Familie drifted usenand, händ kei innere Halt meh und demit au eusi Gsellschaft.

Da stellt sich d Frag: was chömmer tue? Ich han mich gfraged, was chömmer bi Xylosan mache? Well d Firmene hättet doch viel Möglichkeite zum Familie unterstütze! Em Schutz vu de Familie und de Unterstützig vu de Mamis sötti oberschti Priorität gälte! Und das heisst meh als unbegränzti KITA-Plätz z schaffe!

Ich finde Mami si isch definitiv de aspruchsvollschti Job, wo ich je gha han, aber au definitiv en sehr erfüllende und eine mit viel Wachstumspotential für die persönlichi Entwicklig und die vu allne Beteiligte!

Es Mami leischtet doch unglaublich viel, im Hintergrund, mer kriegt derfür keis Diplom, s wird nid i de Ziitig drüber brichtet, oder eim nid uf d Schultere chlopft: choche, wäsche, putze, z Nüni mache, ufruume, ichaufe, flicke, de Geburtstagschueche bache, is Training hi fahre und wieder zrug, regelmässig uf em Instrumänt üebe, Ufzig zäme mache und debi nid vergässe z lache.

Ja, und mier erwartet, dass s Chind i de Schuel guet nachunt, sich sozial tuet entfalte, gsund und vital isch. Alles git doch es Mami, dass sich s Chind cha optimal entfalte!

Als Mami sött mer doch i eusere uf üsseri Wärt fokussierte Gsellschaft, en Super-Woman sii, oder? En liebevolli Muetter, wo de Hushalt und d Chind immer im Griff het; en super Partnerin, wo attraktiv, schlank und fit usgseht und debi nu Karriere macht. Das cha mängisch zu ächte Spannige fühere – gahts dier au eso?

Das sind all die üssere Sache, wo eim als Mami doch Tag i Tag uus beschäftiget. Debi muess au ich mich immer wieder bi de Nase näh und luege, dass ich de Fokus nach inne nid verlüüre. Um was gaht’s eigentlich? Was isch würkli wichtig? Und de wird’s Läbe plötzlich wieder eifach!

Grad i de hüütige Ziit vu de schiinbar unbegrenzte Möglichkeite, de Informationsfluet und Kurze    Ufmerksamkeitsspanne, isch es so wichtig, dass d Chind dehei en Ankerpunkt händ. Und de Ankerpunkt bisch meischtens du, Mami. Es Biispiel vu Liebi, Halt, moralische Wärt und Geborgeheit!

Dass du en Ankerpunkt chasch sii gilts im Jongliere und Usbalanciere vu allne Bedürfnis, sich sälber nid z vergässe – und zwar au zum Wohl vu de ganze Familie! Es isch doch so: wenn s Mami nid 100% funktioniert, funktioniert i de Familie oft gar nüd meh.

Drum isch s umso wichtiger, dass d Mamis ihri wichtigi Uufgab, als Ankerpunkt i de Familie, als Hüeterin & Beschützerin vu de nöchschte Generation chönd wahrnäh!

De Ankerpunkt cha mer für die eigni Familie nur si, wenn mer sälber i sich verankere tisch, i sinere volle innere Stärki, im Härz, i de Liebi.

I dem Sinn wünsch ich dier viel Liebi und hoffe, du wirsch a dem Muetertag vu dinere Familie als Heldin so richtig gfiiret!